កូរ៉េខាងត្បូង បានបង្ហាញយន្តហោះដែលផលិតនៅក្នុងប្រទេសមួយគ្រឿងដំបូងកាលពីថ្ងៃទី២០ កក្កដា ដោយចាត់ទុកថា ជាផ្នែកមួយនៃកិច្ចខិតខំប្រឹងប្រែងក្នុងការអភិវឌ្ឍយន្តហោះពាណិជ្ជកម្ម ។ យន្តហោះប្រើកង្ហារមួយមាន៤កៅអីមួយគ្រឿងនេះ ធ្វើឱ្យកូរ៉េខាងត្បូងក្លាយជាប្រទេសទី២៨ នៅលើពិភពលោក ដែលអាចផលិតយន្តហោះផ្នែកជំនួញនៅក្នុងប្រទេសបាន។ នេះបើតាមរបាយការណ៍របស់ក្រសួងដែនដីនគរូបនីយកម្ម ការដឹកជញ្ជូន និងដែនសមុទ្ររបស់កូរ៉េខាងត្បូង ។
យន្តហោះថ្មីមួយគ្រឿងនេះដែលមានឈ្មោះថា «ណារ៉ាអុន» ត្រូវបានបង្ហាញជាលើកដំបូងនៅឯឧស្សាហកម្មផ្នែកហោះហើរកូរ៉េ (KIA) ក្នុងទីក្រុងសាឈុន ភាគខាងត្បូង ប្រទេស ផលិតឡើងមានទម្ងន់ស្រាល និងមានឧបករណ៍ការពារធុងប្រេង ។
ក្រៅពីនេះ KIA មានអំណះអំណាងថា យន្តហោះ «ណារ៉ាអុន» ប្រើប្រាស់ថាមពលយ៉ាងមានប្រសិទ្ធភាពច្រើនជាងគូប្រជែងដល់ទៅ១០% ហោះហើរក្នុងល្បឿន៣៨៩គីឡូម៉ែត្រ ក្នុងមួយម៉ោង និងបានចម្ងាយផ្លូវ១.៨៥០គីឡូម៉ែត្រ អាចធ្វើដំណើរទៅដល់ទីក្រុងធំៗ នៅប្រទេសជប៉ុន ចិន និងប្រទេសក្នុងអាស៊ានបានដោយមិនចាំបាច់ចាក់បន្ថែមប្រេង ។
ចំពោះតម្លៃដែលកំណត់ទុកសម្រាប់យន្តហោះ «ណារ៉ាអុន» គឺប្រហែល៦០០លានវ៉ុន ឬប្រហែល៦០០.០០០ដុល្លារ ។ យន្តហោះខាងលើនេះ អាចប្រើសម្រាប់ហ្វឹកហ្វឺនអាកាសយានិកហោះហើរដើរកម្សាន្ត និងអាចប្រើប្រាស់ជាយន្តហោះផ្ទាល់ខ្លួនបានទៀតផង ៕
0 comments:
Post a Comment