ប្រធានាធិបតីកូរ៉េខាងត្បូងលោកលី ម្យុងបាក់ថ្លែងកាលពីថ្ងៃទី៣ តុលា ថា សេដ្ឋកិច្ចរបស់កូរ៉េខាងត្បូងនៅតែល្អប្រសើរ ទោះបីមានវិបត្តិហិរញ្ញវត្ថុពិភពលោកជាមួយនឹងបំណុលជាតិថយចុះហើយការនាំចេញមានខ្ពស់ដោយលោកគូសបញ្ជាក់ថា ការព្រួយបារម្ភយ៉ាងខ្លាំងនឹងពុំជាការល្អឡើយ ដើម្បីជំនះវិបត្តិ ។
ក្នុងសុន្ទរកថាប្រចាំ២ខែម្តងមួយតាមវិទ្យុ លោកលីគូសបញ្ជាក់ថា យើងបានជំនះវិបត្តិហិរញ្ញវត្ថុជាសាកលកាលពីលើកមុនក្នុងសង្វាក់ដ៏ឆាប់បំផុត និងតាមរបៀបដែលទទួលបានជោគជ័យបំផុតលើពិភពលោក ។ ខ្ញុំអាចអះអាងថា សេដ្ឋកិច្ចកូរ៉េ គឺខ្លាំងគ្រប់គ្រាន់ ដើម្បីឱ្យប្រជាជន យើងអាចមានទំនុកចិត្ត ។ លោកលី បានបង្ហាញភស្តុតាងមួយចំនួននៃភាពរឹងមាំខាងសេដ្ឋកិច្ច នេះដូចជាបំណុលជាតិតំណាងត្រឹមតែ៣៣% នៃផលទុនជាតិសរុប ។ ការនាំចេញទៅកាន់បណ្តាប្រទេសដែលមានសេដ្ឋកិច្ចហក់ឡើង ពេលនេះតំណាងឱ្យ៧៣% នៃការនាំចេញទាំងមូលដែលមានការកើនឡើង៥១% បើប្រៀបធៀបទៅនឹងឆ្នាំ២០០១ ។ ទំហំពាណិជ្ជកម្មកូរ៉េខាងត្បូងមានដល់១០០០ពាន់លានដុល្លារនាឆ្នាំនេះ។
លោកលី ថ្លែងទៀតថា រដ្ឋាភិបាលនឹងតាមដានយ៉ាងប្រកិតចំពោះសភាពការណ៍សេដ្ឋកិច្ចក្នុងស្រុក និងនៅឯបរទេសដោយសង្កត់ធ្ងន់ ជាពិសេសលើការធានាខាងថវិកា និងសុខភាពហិរញ្ញវត្ថុខាងក្រៅប្រទេស ។ ប្រព័ន្ធសេដ្ឋកិច្ច បន្ទាន់របស់ប្រទេសត្រូវបានជំរុញកាលពីសបា្តហ៍មុន ហើយកិច្ចប្រជុំពិគ្រោះយោបល់រវាងរដ្ឋាភិបាល និងផ្នែកឯកជនតែងធ្វើជាទៀងទាត់ ៕
0 comments:
Post a Comment