រាជធានីភ្នំពេញ ៖លោកឯក ថា អ្នកនាំពាក្យអង្គភាពព័ត៌មាន និងប្រតិកម្មរហ័ស និងជាអនុប្រធាននាយកដ្ឋានព័ត៌មាននៃទីស្តីការគណៈរដ្ឋមន្ត្រី បានប្រាប់ឱ្យដឹងកាលពីរសៀលថ្ងៃទី៥ ធ្នូ នៅទីស្តីការគណៈរដ្ឋមន្ត្រីថា ក្នុងជំនួបពិភាក្សាការងារជាមួយលោកបណ្ឌិតសភាចារ្យសុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី លោក KIM NAM Seok អនុរដ្ឋមន្ត្រីទីមួយនៃក្រសួងសន្តិសុខ និងរដ្ឋបាលសាធារណៈនៃសាធារណរដ្ឋកូរ៉េ បានជម្រាបលោកបណ្ឌិតសភាចារ្យសុខ អាន ថា កូរ៉េខាងត្បូងនឹងបន្តជួយកម្ពុជា លើផ្នែកកំណែទម្រង់សាធារណៈ និងអាជ្ញាធរអភិវឌ្ឍន៍ប្រព័ន្ធព័ត៌មានវិទ្យាជាតិ(NiDA) ដើម្បីរួមចំណែកផ្តល់សេវាសាធារណៈឱ្យកាន់តែប្រសើរ។
លោកបណ្ឌិតសភាចារ្យសុខ អាន មានប្រសាសន៍ថា រាជរដ្ឋាភិបាលដែលមានក្រុមប្រឹក្សាកំណែទម្រង់ (CAR) បានកំពុងធ្វើការយ៉ាងសកម្មចាប់តាំងពីឆ្នាំ១៩៩៩ ក្នុងការងារកំណែទម្រង់រដ្ឋបាលសាធារណៈ ក្នុងនោះរួមមានការបណ្តុះបណ្តាលមន្ត្រីឱ្យមានសមត្ថភាពការងារ ដើម្បីបម្រើសេវាកម្មសាធារណៈឱ្យកាន់តែប្រសើរ។ កំណែទម្រង់កន្លងមក មានការកាត់បន្ថយកងទ័ព មន្ត្រីស៊ីវិលដែលមិនប្រក្រតី បង្កើនសេវាកម្មសាធារណៈ...។
ក្នុងកិច្ចពិភាក្សានោះ លោក KIM NAM Seok មានប្រសាសន៍ថា កូរ៉េខាងត្បូងនឹងពិភាក្សា និងធ្វើការបន្ថែមជាមួយក្រុមប្រឹក្សាកំណែទម្រង់រដ្ឋបាល និងជាមួយ NiDA ដើម្បីរៀបចំផែនការសហប្រតិបត្តិការទ្វេភាគីឱ្យបានលម្អិតបន្ថែមទៀត មុនពេលបញ្ជូនអ្នកជំនាញកូរ៉េមកជួយបណ្តុះបណ្តាលដល់មន្ត្រីកម្ពុជា ឬត្រូវបញ្ជូនមន្ត្រីកម្ពុជាទៅសិក្សាជំនាញនៅប្រទេសកូរ៉េ។ កូរ៉េខាងត្បូងនឹងជួយបណ្តុះបណ្តាលសមត្ថភាពដល់មន្ត្រីស៊ីវិលកម្ពុជាផ្នែកសេវាកម្មសាធារណៈ ក៏ដូចជាផ្នែកព័ត៌មានវិទ្យាទំនាក់ទំនងទ្វេភាគីផ្នែកវិស័យកសិកម្មផងដែរ។ សព្វថ្ងៃមានក្រុមហ៊ុនកូរ៉េខាងត្បូងកំពុងប្រកបរបរពាណិជ្ជកម្មជាង៥០០នៅកម្ពុជា។
ទន្ទឹមនេះ លោកឧបនាយករដ្ឋមន្ត្រីសុខ អាន បានលើកទឹកចិត្តកូរ៉េខាងត្បូងឱ្យជួសជុល និងអភិរក្សបេតិកភណ្ឌជាតិកម្ពុជា នៅខេត្តសៀមរាប ក្រោយពីកូរ៉េបានកសាងផ្លូវប្រមាណជា៣២គីឡូម៉ែត្រនៅជុំវិញតំបន់អង្គរ៕
0 comments:
Post a Comment